妹妹與我 My Sisters and I

今次係我第一次寫篇中文網誌！用白話寫的比較親切，但以後會多嘗試用較正統的書面語 

平時寫鬼佬野用鬼文，今次想寫兩個妹妹都係用中文貼切啲！（當我老公見到哩段佢睇唔明嘅文佢可能更加感激我平時俾佢嘅英文「平台」係幾咁廣泛！哈！）

點解想寫妹妹呢？

因為我地由細到大同一張上下格床、同校、一齊買野、一齊玩、連衫褲裙鞋都因為身型品味差唔多可以互相「借」來著。。。

可是而家我地三個都各自各忙，甚至我住得九萬幾丈遠，真係好掛住佢地！










之前用鬼文寫過一篇文係提及過我有啲感慨大家成長了，各自走各自嘅路同面對未來嘅未知數。。。

值得慶幸嘅係大家喺精神上嘅感情如一！我地而家日日都有WhatsApp，交換相、錄下音、正經或無聊野都講一餐！

最感激佢地嘅係佢地雖然唔捨得我離開香港，但從來冇喺我思鄉「發作」時撥冷水或聳恿我放棄美國生活。反而係陪我呻埋一份或講正面說話。事實上我先係大家姐，要妹妹鼓勵返我絕對不能理所當然啦！




這位是我最細的妹妹！

我地年齡相隔四年，唔多唔少。從前覺得佢最靚女，最得意、奀皮，但又好玩得！仲好串嘴添！現在覺得佢成熟左好多，世故左。佢係俾我最多鼓勵說話嘅妹妹！




我哩個妹好有美術天份！細細個時佢成日畫漫畫公仔落功課簿，仲畫屋企堵牆， 哈哈！我老公回歸美國前，佢花左好多心思整哩張卡送俾我老公留念。當中嘅心機同體貼真係令我地兩公婆好感動！
但我亦最掛心佢。。。因為佢失去左佢同我全家曾經都喜歡嘅人之後都未能夠遇到下一位。其實佢由細到大都好多觀音兵，不過佢同我喺愛情路上一樣好奄尖，好謹慎。。。但我比佢幸運，早一步遇到對的人。我時時刻刻都希望有個好男仔會識得欣賞佢！

我老公話我地兩個家姐間接寵壞咗佢變得對人要求高。其實我地又真係好錫哩個細細妹，但我相信真心愛佢嘅男仔同樣可以做得到。係遇唔遇到哩位真心人嘅問題！我同老公講笑佢同我妹夫係全世界最好嘅老公之一，如果再有多個會上榜嘅俾我細細妹就好喇！

六月份佢生日我寄左卡同禮物俾佢。張卡有句說話雖然簡短但係我最希望佢得到的：Out of everything I wish you happiness in life!


好鍾意佢今年個生日蛋糕！其實佢鍾意左哩隻duck好耐！不過突然間香港遇上鴨仔效應，佢先咁容易收到個咁貼切嘅蛋糕！




哩位係我另一個妹妹！睇唔睇得出我地只差一年？不過佢唔知食咩食到佢個樣長期好低B。我妹夫叫佢做細路！街外人有時都誤以為佢係最細！過份啦！反而以前我地細細個時長期都有街坊問我地係咪twins。但其實我似媽咪，佢似爸爸。

入番正題。。。其實哩位「妹妹仔」就快做人媽咪喇！！！當佢計劃要小朋友時，佢同我傾，我都嚇左一跳！原因係佢平時極少母愛，哈哈！不過佢話唔想超齡喎！其實佢咁講即係暗示我就黎超齡啫！哼！我都未驚過！

其實諗深一層，我哩個妹不嬲都有「領先」嘅「潛質」。例如第一次考第一名（佢考過N次第一！我就五隻手指數得哂）、第一次穿耳、第一次買名牌、第一次出電話、第一次拍拖 、第一次買樓。。。 通通係佢先！不過影婚紗相同結婚我扒返頭，哈！早佢一年咁大把！其實講返細細妹，佢雖然最細最多人錫佢，不過佢似乎有好多野我同二家姐試過或擁有，佢都未有份。所以錫佢多啲都好公平！

當大細妹同我講有咗BB嘅好消息，我超級極度激動！！仲喊左！我老公見到都知我又黎「多愁善感」。咁人地真係好感動吖嘛！我不斷話：It is gonna be my sister's baby! The baby of my sister! She is my sister! I love my sister! 哈哈！


我好開心最近學好織下帽仔、鞋仔，可以大派用場！好想整野俾我地「伍氏姊妹」第一個BB呢！

有個笑話係我睇完細妹張醫生紙，預產期寫住12／1／2014，我後尾竟然整定My first Christmas主題嘅帽仔。點解？因為我唔知仲乜鬼睇左日期為12月1號！仲以為BB今年趕及過聖誕節！我細妹同我傾計時先無意知道個「真相」！原來我當左美式日期咁睇（美式日期為月日年）！哎呀！我幾時「美化」左咁多？！仲要後來我老公笑我：寫住2014喎 ！我話：我太興奮淨係見到日同月！佢暗笑：你同數字真係唔夾。俾佢睇死係因為我是家中出名的數學／字白痴！

其實我哩個妹好幸福，佢老公就哂佢，咩都俾佢，又煮飯佢食（我妹夫煮野好叻！）而我老公就笑佢有公主病，哈哈！仲話好在我冇！我窒返佢：如果我有你都未必做得到好似我妹夫咁啊可？佢就啤我同擰頭 （哈哈！我地經常窒來窒去！太認真就唔好玩。）不過其實我哩個妹絕對係好老婆，當市道低迷時支持佢老公圓夢做老闆。其實有自己生意係要犧牲好多野。賣下廣告先，佢地間店喺大角咀港灣豪庭商場地下 (the Corners)，專賣有機生果同入口食品：小食、意粉、調咪料、牛扒、海鮮、刺身、紅白酒、汽酒等等。我都想返香港參觀吓！

其實我同哩個妹 friend到不得了， 所以曾經佢好介意我將時間俾哂我當時個遠距離男友同而家個老公。。。我內咎之餘都只好坦白同老公講，好在佢明白，仲刻意用誠意令我妹妹軟化！


其中一個例子係我老公安排咗個驚喜喺妹妹同妹夫婚宴演奏佢地既歌: Eason Chan嘅幸福摩天輪 。我一路聽住老公咁用心吹又望到細妹咁開心，我都眼濕濕！


參加妹妹個婚禮真係同自己結婚一樣好開心！







四年前嘅暑假我喺美國結婚 ，我地兩公婆係教書就話有長假期。佢地飛成十六幾粒鐘黎十日，真係唔容易！但亦令我地嘅honeymoon過得好warm！

漸漸地，妹妹都對我老公好sweet， 同我老公攪生日surprise party 同farewell！哩個蛋糕我全家一世都記得！除左因為有意義 ，仲因為baker 串錯字！哈哈 ！激死又笑死 ！我同老公回美國後，佢仲係第一時間送個Prada卡片套俾我老公開工大吉！


哩張喺機場送機時影。嗰一日我屋企人揀喺機場同我飲茶，佢地話以後我會好少飲！我聽到覺得好細心但又好sad。到左入閘前我同佢地抱抱又講保重說話，極度眼淺嘅我忍淚忍得好辛苦！後來細妹同我講番同我一樣眼淺嘅媽咪一見我入左閘轉身就喊！我要令我屋企人咁唔捨得我，其實好心痛，甚至內咎。所以當有時我思鄉又「發作」，低落起上黎都好無賴咁話我老公：It's all your fault! 老公就無奈回應：I know. I am sorry baby. 當時其實只係搵人發洩，因為離開香港係兩個人嘅決定。好在老公太了解我性格 -「口不對心」，講就恨，心其實好軟


其實熟悉我地三姊妹嘅人就會知道我地其實外貌同性格都好唔一樣 ！不過有一個共通點係大家成長之後先愈來愈明顯 - 我地同樣好珍惜一家人相處嘅時光同好想孝順日漸年長嘅爸爸同媽咪！

我地三姊妹會唔會嗌交？實會啦！仲可以好激、好無聊。唔係大家分開左住就冇意見不合咁簡單。反而係期望同付出要比一齊住時難配合。不過當你重視一段關係，反臉到幾甘都要做反省同放下脾氣，講句對唔住，甚至扮冇事發生過傾返計又和好如初！不過通常我都覺得對唔住哩三個字係有必要講，講完舒服好多！聽嗰個亦都會覺得窩心。

可能因為我經歷離別同重聚嘅頻率多，我更加感受到有時最好嘅唔一定要時時刻刻都喺身邊。距離反而更令你睇清楚一段關係。當年同我老公相隔異地七年係咁，而家同屋企人同朋友相隔我都係用哩個尺度分真心同誠意！現階段我好珍惜同妹妹保持聯繫，又超期待同佢地團聚！！到時又雞琢唔斷！三個女人一個墟就係我地！

原來我用中文都可以寫得咁長！我諗係我提起屋企人就會滔滔不絕。如果你咁有耐性睇到哩到，多謝賞臉喇！